Svigrúm til frekari lækkunar

Fátt kemur á óvart við þá ákvörðun Seðlabankans að lækka vexti í dag um 0,5 prósent að mati Bjarna Más Gylfasonar hagfræðings Samtaka Iðnaðarins.

„Ég vænti þess að rök bankans verði á þá leið að smávægilegt svigrúm hafi skapast til lækkunar vaxta vegna þess að gengi krónunnar hefur verið að styrkjast lítillega eða m.ö.o. hafa gjaldeyrishöftin verið að halda bærilega. Seðlabankinn virðist ekki eiga marga kosti en að fara varlega í að lækka vexti. Ég tel þó að meðan höftin virka og eru til staðar sé enn talsvert svigrúm til að lækka vexti frekar“, er haft eftir Bjarna Má á vef SI.

Stóra málið núna sé að reyna koma því fjármagni sem liggur óhreyft í bönkunum í vinnu. „Á sama tíma og þörfin fyrir að koma einhverri hreyfingu á efnahagslífið hjá okkur liggja gífurlegar upphæðir óhreyfðar inn á innlánsreikningum í bönkunum.“ Vandinn sé sá að vextir séu tiltölulega háir og augljósir fjárfestingakostir vandséðir, nema ríkisskuldabréf sem er að soga til sín gífurlegt fjármagn. „Það verður að vinda ofan af þessari stöðu og eina leiðin er að draga úr fjármagnsþörf ríkisins með því að eyða hallanum og hins vegar að halda áfram að lækka vexti. Þannig má skapa bæði getu og hvata fyrir einkageirann til að fjárfesta á ný“, segir Bjarni Már.

• 3 blogg um fréttina

Bloggað um fréttina

• Jóhann Elíasson: ÞETTA VAR ALVEG FYRIRSÉÐ....................
• Kristinn Snævar Jónsson: Hundalógík hávaxtastefnunnar
• Guðni Karl Harðarson: Burt með Seðlabankann!