Innlent | mbl | 18.3.2010 | 9:31

Fjölmennur fundur um heilbrigðismál

Þorvaldur Örn Kristmundsson

Hátt í 200 manns sitja nú á fundi Samtaka atvinnulífsins um heilbrigðismál sem stendur yfir á Hótel Nordica. Yfirskrift fundarins er Hvernig fáum við það besta úr heilbrigðiskerfinu?

Bæta þarf afkomu ríkissjóðs um meira en 100 milljarða króna á næstu árum. Heilbrigðismálin eru stærsti útgjaldaliður ríkissjóðs og því ljóst að áform efnahagsáætlunar íslenska ríkisins og Alþjóðagjaldeyrissjóðsins um hallalaus fjárlög árið 2013 næst ekki nema með verulegri lækkun útgjalda til þessa málaflokks, að því er segir á vef SA.

„SA leggja áherslu á að unnið verði út frá ábendingum OECD um heilbrigðismál á Íslandi. Hér á landi er þjónusta í of miklum mæli veitt af dýrum þjónustuaðilum á óþarflega háu tækni- og þjónustustigi, kostnaðarþátttöku er ekki beitt nægilega markvisst og ekki er nægileg samkeppni á milli þjónustuaðila. OECD telur kostnað í íslenska heilbrigðiskerfinu geta lækkað um 1,5% af landsframleiðslu án þess að dregið sé úr þjónustu. Þá er hlutur einkaaðila í veitingu heilbrigðisþjónustu of lítill á Íslandi.

Efnahags- og þróunarstofnunin, OECD, hefur um nokkurra ára skeið í skýrslum sínum um Ísland (2006, 2008 og 2009) veitt ráð um hvernig auka megi hagkvæmni í heilbrigðiskerfinu en íslensk stjórnvöld hafa daufheyrst að mestu við þessari ráðgjöf. Staðan í ríkisfjármálunum er hins vegar sú að það verður að leita allra leiða til að draga úr kostnaði án þess að það komi með samsvarandi hætti niður á þjónustunni. OECD telur mikið svigrúm á Íslandi til bættrar nýtingar mannafla, fjármagns og annarra aðfanga," segir á vef Samtaka atvinnulífsins.