Staðsetning gæti þýtt að ekki verði neitt ofanflóð

Páll Einarsson jarðeðlisfræðingur og prófessor við Háskóla Íslands segir í samtali við mbl.is að enn sjái hann ekki merki um jarðhræringar á jarðskjálftamælum. Hann getur því lítið tjáð sig um eðli og umfang gossins sem nú virðist vera hafið í Eyjafjallajökli.

Ástæður þess að ekki sjáist virkni á skjálftamælum segir Páll geta verið ýmsar, meðal annars þær að gosið sé lítið að umfangi. Hins vegar sé það mjög óvenjulegt að gos sé hafið en komi ekki fram á jarðskjálftamælum. Hann mun fylgjast með þróuninni í nótt.

Fréttir hafa nú borist af því að gosið sjáist frá Fljótshlíð og sé norðaustantil í Eyjafjallajökli. Aðspurður um það hvað sú staðsetning segi honum um framhaldið segir Páll að þá sé gosið mögulega norðantil í Fimmvörðuhálsi. Það geti mögulega þýtt að ekki verði neitt ofanflóð vegna gossins. Það sé hins vegar alls óvíst. Hann vill hins vegar lítið segja um þetta á þessum tímapunkti, enda fréttir allar frekar óljósar enn sem komið er.

• 1 blogg um fréttina

Bloggað um fréttina

• S i g u r ð u r S i g u r ð a r s o n: Fjöldi fornra gíga er á Fimmvörðuhálsi