Hæna týndist og hundur gelti

Ýmis verkefni komu á borð lögreglunnar á Selfossi í liðinni viku. Má þar nefna tilkynning um  týnda hænu í Hveragerði og geltandi hund á Selfossi.

Tilkynnt var um tvær bílveltur í umdæmi lögreglunnar á Selfossi um helgina.  Sú fyrri varð um kvöldmatarleytið á föstudagskvöldið á Hellisheiði þar sem ökumaður, einn í bifreiðinni, missti stjórn á bifreið sinni í krapa og hálku með þeim afleiðingum að bifreiðin fór útaf veginum og valt.  Sjúkrabifreið fór á staðinn en ökumaður reyndist ómeiddur. 

Síðara tilvikið átti sér stað rétt eftir miðnætti á föstudag á Villingaholtsvegi  við félagsheimilið Þjórsárver.  Ungur ökumaður með fjóra farþega missti stjórn á bifreið sinni á mótum bundins slitlags og malarlags á veginum.  Bifreiðin fór eina og hálfa veltu.  Ökumaður og  farþegarnir fjórir voru fluttir með sjúkrabifreið á heilsugæslustöðina á Selfossi til aðhlynningar en enginn reyndist alvarlega slasaður. 

Ökumaður sem lögreglumenn höfðu afskipti af vegna hraðaksturs reyndist einnig undir áfengisáhrifum.  Ellefu aðrir ökumenn voru kærðir fyrir hraðakstur.  Einn ökumaður var kærður fyrir að aka bifreið sviptur ökuréttindum. 

• 1 blogg um fréttina

Bloggað um fréttina

• Tryggvi Þórarinsson: Ríkisstjórnin týndist og stjórnarandstaðan geltir, smellpassar við fréttina er það …