Innlent | mbl | 30.3.2010 | 17:56

Segir ríkisstjórnina eiga að fara frá

Björn Bjarnason.

Björn Bjarnason, fyrrverandi ráðherra, segir á heimasíðu sinni að ræða Jóhönnu Sigurðardóttur, forsætisráðherra, á flokksstjórnarfundi Samfylkingarinnar um síðustu helgi, staðfesti að ríkisstjórnin sé komin að fótum fram og einskis trausts verð.

„Hafi Jóhönnu verið talin trú um, að ræðan sneri vörn í sókn, sýnir það best, hve einangruð hún er og ráðgjafar hennar," segir Björn meðal annars og bætir við að ræða Jóhönnu, störf og stefna ríkisstjórnarinnar kalli aðeins á eitt: að stjórnin segi af sér.

„Á vakt Sjálfstæðisflokksins hefði átt að bregðast við afleiðingum hrunsins af meiri festu. Þá var stjórnmála- og stjórnsýslukerfið í áfalli eftir hina miklu byltu. Ríkisstjórn Jóhönnu hefur gjörsamlega mistekist í viðbrögðum sínum við afleiðingum hrunsis. Vegna Icesave-málsins er hún rúin trausti erlendis. Engum dettur í hug að semja við hana í þriðja sinn um sama málið.

Ríkisstjórnin hefur enga stjórn á ESB-aðildarmálinu. Umsóknina ber að draga til baka. Hún varð til af óvild í garð Sjálfstæðisflokksins og sem vopn í höndum Samfylkingar til að réttlæta stöðnunarstjórn með VG.

Skattastefna ríkisstjórnarinnar er skref til efnahagslegs sjálfsmorðs að mati Ragnars Árnasonar, hagfræðiprófessors," segir Björn meðal annars.

Pistill Björns Bjarnasonar