Kveikt í sinu í Þykkvabæ

Sina brennur í Þykkvabænum og sést reykurinn víða að. Ekki er talið að mannvirki séu í hættu.

„Ég sé að það er reykur hérna innfrá, inni á mýrum,“ segir Sigurbjartur Pálsson, íbúi í Þykkvabæ þegar hann var spurður um sinueldinn.

Sinueldurinn er í stóru beitilandi fyrir ofan byggðina. Þar er oft kveikt í sinu. Sigurbjartur segist ekki vita hvort það hafi verið raunin nú.

Samkvæmt upplýsingum lögreglunnar á Hvolsvelli stafar engin hætta af sinueldinum. Slökkvilið var sett í viðbragðsstöðu en ekki var talin ástæða til að slökkva eldinn.

Talið er að bændur eða búfjáreigendur hafi kveikt í sinu án þess að hafa til þess tilskilin leyfi, samkvæmt upplýsingum lögreglu. Málið verði skoðað og fari sína leið.

• 1 blogg um fréttina

Bloggað um fréttina

• Þröstur Þorsteinsson: Sinueldurinn við Þykkvabæ - reykský sést á gervitunglamynd