Leitað að þremur

Leit er hafin að að dökkbláum Honda CRV árg. 1999 með einkanúmerið R 532. Í bílnum voru karl fæddur 1955 og tvær konur fæddar 1967 og 1977. Ökumaðurinn bað um aðstoð upp úr klukkan tvö í fyrrinótt. Hann var villtur en taldi sig vera innan við Fljótshlíð. Númerisplötu vantar líklega framan á bílinn.

Uppfært kl. 9.07

Nú eru þrír björgunarsveitarbílar og lögreglubíll við leit á svæðinu. Tveir bílanna eru frá björgunarsveitinni Dagrenningu á Hvolsvelli og einn frá Flugbjörgunarsveitinni á Hellu.  Ekkert hefur enn spurst til fólksins en það er íslenskt.

Lögreglan hefur upplýsingar um að um klukkan eitt eftir miðnætti á sunnudag var bílinn kominn á aurana innan við Tröllagjá, sem er innan við Gilsá og á leiðinni að Einhyrningi.

Þá gerðu lögregla og björgunasveitir fimm tíma leit á svæðinu. Að sögn lögreglunnar á Hvolsvelli var ökumaðurinn í símasambandi við hana alla nóttina en var rammvilltur. Hann taldi sig vera í Fljótshlíð og sá til eldgossins en engin önnur kennileiti. Mikil leit var gerð að bílnum um nóttina.

Um klukkan 6.30 í gærmorgun hringdi ökumaðurinn í lögregluna og afþakkaði aðstoð. Hann var þá búinn að losa bílinn og kvaðst vera kominn á einhvern slóða.

Ættingjar fólksins fóru síðan að grennslast fyrir um það um klukkan tvö í nótt.  Björgunarsveitir hafa verið við leit á svæðinu síðan en ekkert hefur komið fram um afdrif fólksins. Mögulegt er talið að það hafi komist til byggða án þess að láta vita af sér.

• 1 blogg um fréttina

Bloggað um fréttina

• Haraldur Haraldsson: Bíls með þremur í saknað/leit farin af stað !!!!!