Eldgosið á Fimmvörðuhálsi hefur byggt upp 82 m hátt fjall og hraunið þekur ríflega 1,3 km² svæði og er þykkt þess víðast 10-20 metrar að því er fram kemur á vefslóðinni jardvis.hi.is.

Þann 7. apríl sl. þakti hraunið  um 1,3 km² og er þykkt þess víðast 10-20 metrar. Þykkast er það næst gígnum að austan eða um 30 metrar. Rúmmál gosefna var orðið 22-24 milljón rúmmetrar þann 7. apríl. Hraunrennsli hefur því að meðaltali verið 15 m³/s sem samsvarar 30-40 tonnum á sekúndu.

Til að setja gosið í samhengi má nefna að heildarmagnið er nú orðið svipað og í Grímsvatnagosinu 2004, 15-20% af því sem kom upp í Heklugosinu 2000 og tæplega tíundi partur af gosefnum í Vestmannaeyjagosinu 1973. 

Gosið á Fimmvörðuhálsi hófst á flata milli tveggja hæða. Norðan gíganna er Brattafönn með hæsta hnjúk í rúmlega 1.040 m hæð. Sunnan gíganna er önnur hæð í um 1.083 m hæð. Hæsti hluti fjallsins sem hefur myndast í gosinu er hærri en Brattafönn en lægri en hnjúkurinn sunnan við gosstöðina. Er hæð gosstöðvanna var mæld hinn 7. apríl kom í ljós að fjallið, sem er í þeim hluta sem ekki gýs í lengur, rís nú í 1067 m hæð yfir sjávarmáli. Upphafleg hæð á þessum stað var hins vegar 985 m og hefur gosið því byggt upp um 82 m hátt fjall.

Til hliðar er svo gígur á nýju gossprungunni. Þar var mikil kvikustrókavirkni er mælingin fór fram. Hæsti hluti gígbarmsins reyndist á þeim tímapunkti vera 1.032 m hár. Hann hafði byggst upp um 47 m, meira en helming af hæð meginfjallsins.   

Tengdar fréttir

Eldgos í Eyjafjallajökli

Tíu ár frá því gos hófst í Eyjafjallajökli

• Öskuský tíðari en áður var talið
• Samráð við heimamenn nauðsynlegt
• Fimm ár frá eldgosunum
• Gjörbreytt sýn á jökulinn

» Fleiri tengdar fréttir

• 4 blogg um fréttina

Bloggað um fréttina

• Halldór Sigurðsson: Og eldgosið gengur enn- myndbönd
• Guðlaugur Hermannsson: Köllum hraunið "Litla Hraun"
• S i g u r ð u r S i g u r ð a r s o n: Kreppa kallast á við Bölmóð.
• Njörður Helgason: Getur með tímanum hlaðið upp myndarlegri gosstöð.