Hlaupið er komið að Markarfljótsbrú og hefur rofið skarð í varnargarðinn austan við ána. Vegagerðarmenn náðu að rjúfa skarð í veginn og þar spýtist jökulvatn af miklum krafti. Vegagerðarmenn ætla sér að rjúfa þrjú skörð í veginn.

Rúnar Pálmason blaðamaður er við Markarfljótsbrú og segir að það vaxi stöðugt í ánni. Vatnið sé ekki komið upp í brúargólfið en það sé stutt í það. Um hádegisbil náði hlaupið að rjúfa skarð í varnargarð austan við ána. Vatn streymir núna upp að veginum í Þórsmörk.

Skarð var rofið í veginn um 50 metra austan við brúna. Mikil kraftur er í hlaupinu og spýtist nú vatn um skarðið. Vatnið er farið að flæða yfir varnargarða austan megin við Markarfljótsbrú.

Vegagerðarmenn rufu annað skarð í veginn austan við varnargarðinn og ætla sér að rjúfa þriðja skarðið í veginn til að létta á straumnum og auka líkur á að brúin standi flóðið af sér. Hlaupið sér sjálft um að stækka skörðin. Allar eyrar við brúna eru komnar á kaf.

Í tilkuynningu frá almannavörnum segir að vatnsmagn frá eldstöðinni í toppi Eyjafjallajökuls sé mikið og gosið miklu stærra en gosið á Fimmvörðuhálsi.  „Gossprungan er núna um tveggja kílómetra löng og liggur norður - vestur.  Vatn fer til norðurs og suðurs og getur auðveldlega farið yfir varnargarðana á Markarfljótsaurum. Þjóðvegur 1 er í hættu á að rofna undir Eyjafjöllum.  Loftfar á vegum Landhelgisgæslu verður yfir gosstöðvunum í dag og um borð verða jarðvísindamenn og sérfræðingar frá Vatnamælingum.“

Tengdar fréttir

Eldgos í Eyjafjallajökli

Tíu ár frá því gos hófst í Eyjafjallajökli

• Öskuský tíðari en áður var talið
• Samráð við heimamenn nauðsynlegt
• Fimm ár frá eldgosunum
• Gjörbreytt sýn á jökulinn

» Fleiri tengdar fréttir

• 3 blogg um fréttina

Bloggað um fréttina

• Heimir Lárusson Fjeldsted: Nýr fréttamaður 365
• Sigurbjörg Eiríksdóttir: Skýrslan dottin úr umræðunni?
• Njörður Helgason: Mannvirkin standa þetta tæplega.