Bíða gjóskufallið af sér

„Við horfðum á þetta koma,“ segir Bryndís Harðardóttir, hjá Svæðisstjórn almannavarna í Vík í Mýrdal, en gjóskufall varð á svæðinu um klukkan átta í kvöld. Bryndís segir það minna en það sem hafi fallið í gær. Það hafi hins vegar komið hratt yfir, en vindáttin varð norðvestlæg í kvöld.

Öskufallið nær frá Múlakvísl í austri og að Skógum. 

Hún segir að heldur hafi dregið úr gjóskufallinu. Þetta komi í gusum, en dragi úr á milli. „Þetta er ekkert í líkingu við öskufallið í gærmorgun. Þetta er alveg gjörólíkt því. Þetta er mikið minna og ekki svona dimmt,“ segir hún í samtali við mbl.is.

„Ég er með disk úti og maður sér alveg að hann er orðinn grár. Þetta er mjög fíngert,“ segir hún um öskuna, sem minni um margt á sement. 

Hún segist ekki sjá fjöllin í kringum þorpið vegna öskufallsins. „Við förum ekki að gegna skepnum þannig að við kveikjum bara á kertum og höfum það huggulegt,“ segir Bryndís. Menn bíði einfaldlega þangað til þetta gangi yfir.

„Við vorum búin að undirbúa þetta. Allar fjórar björgunarsveitirnar í Vestur-Skaftafellssýslu fóru á heilsugæslustöðvarnar og keyrðu grímur og gleraugu heim til bænda,“ segir Bryndís í samtali við mbl.is. 

• 3 blogg um fréttina

Bloggað um fréttina

• S i g u r ð u r S i g u r ð a r s o n: Er hægt að skrúfa fyrir öskuframleiðsluna?
• Halldór Sigurðsson: Flott gos - mynbönd
• Njörður Helgason: Sýnishorn?