Innlent | mbl | 11.5.2010 | 8:10 | Uppfært 13:42

Mikið hrun úr Bjarnarey

Fyllan úr Bjarnarey sem féll fram er gríðarmikil. Ljósmynd/Gunnlaugur Erlendsson

Mikið hrun varð úr Bjarnarey við Vestmannaeyjar í nótt þegar stór fylla úr norðanverðri eynni féll fram. „Eyjan hefur öðlast alveg nýjan svip með þessu,“ sagði Gunnlaugur Erlendsson skipstjóri á Þór, björgunarskipi Björgunarfélags Eyjamanna, sem sigldi frá Eyjum upp í Bakkafjöru í nótt.

Á leiðinni til baka sigldu skipverjar fram hjá eynni og áætlar Gunnlaugur að að hrunið hafi úr eynni á um það bil 50 til 100 metra kafla. Þar sem sjór féll áður að þverhníptu bjargi er nú grýtt fjara. „Það hafa ábyggilega þúsundir tonna fallið þarna niður. Þetta er ótrúlegt,“ sagði Gunnlaugur þegar mbl. ræddi við hann fyrir stundu. Smábátasjómaður varð vitni að þessum atburðum í nótt.

Skipverjar á Þór voru í sjúkraflutningi þegar þeir komu að eynni í nótt. Barnshafandi kona í Eyjum átti í erfiðleikum og til öryggis var hún send á sjúkrahús á fastalandinu. Þetta er í fyrsta sinn sem siglt er í þessu skyni milli lands og Eyja.