Innlent | mbl | 12.5.2010 | 6:56 | Uppfært 8:45

Óska kyrrsetningar eigna

Hjónunum Ingibjörgu Pálmadóttur og Jóni Ásgeiri Jóhannessyni hefur verið stefnt fyrir Hæstarétt í New York mbl.is/Sverrir Vilhelmsson

Dómstóll í London hefur gefið út úrskurð, að kröfu Glitnis, um kyrrsetningu eigna Jóns Ásgeirs Jóhannessonar um víða veröld. Þeirra á meðal eru tvær íbúðir í auðmannahverfinu Gramercy Park á Manhattan sem hann keypti á u.þ.b. 25 milljónir dala, 3,2 milljarða króna. Líkt og fram kom á mbl.is í gærkvöldi þá hefur Glitnir höfðað mál gegn Jóni Ásgeiri og fleiri aðilum fyrir dómstól í New York.

Glitnir banki hóf í gær málaferli fyrir dómstól á Manhattan í New York-ríki í Bandaríkjunum gegn Jóni Ásgeiri Jóhannessyni, áður helsta hluthafa bankans, Lárusi Welding, áður forstjóra Glitnis, Þorsteini Jónssyni, áður stjórnarformanni, ásamt fleiri fyrrverandi stjórnarmönnum, hluthöfum og öðrum sem áttu hlut að máli með Jóni Ásgeiri, fyrir að hafa með sviksamlegum og ólöglegum hætti haft fé af bankanum sem nemur meira en tveimur milljörðum dala.

PricewaterhouseCoopers tók þátt í svikum

Glitnir höfðar jafnframt mál gegn PricewaterhouseCoopers, fyrrum endurskoðendum bankans, fyrir að greiða fyrir og taka þátt í að dylja þau sviksamlegu viðskipti sem Jón Ásgeir og félagar komu í kring og sem að endingu leiddu til falls bankans í október 2008.

Í tilkynningu sem slitastjórn Glitnis sendi frá sér í nótt kemur fram að Jón Ásgeir, aðaleigandi fjárfestingarsamstæðunnar Baugs, sem nú hefur komist í þrot – mun vera til heimilis í Bretlandi. Hann situr þar í stjórn nokkurra vel þekktra fyrirtækja, þ. á m. Iceland Foods og House of Fraser, sem bæði eru meðal kunnustu smásölufyrirtækja þar í landi.

Gögn málsins, sem dómfest var í New York 11. maí, leiða í ljós:

Brutu gegn íslenskum lögum og settu á svið aragrúa flókinna viðskipta

„Hvernig klíka fésýslumanna, undir forystu Jóns Ásgeirs, tók sig saman um að hafa með skipulegum hætti fé af Glitni til að styðja við sín eigin fyrirtæki þegar þau riðuðu til falls. Hvernig Jón Ásgeir og samsærismenn hans brutust til valda í Glitni, losuðu sig við reynda starfsmenn bankans eða settu þá til hliðar og misnotuðu þessa valdastöðu til að tefla fjárhag bankans í bráðan voða.

Hvernig Jón Ásgeir, Lárus Welding og aðrir, sem stefnt er í málinu, sköpuðu sér aðstöðu til að ná fé út úr bankanum og halda gerðum sínum leyndum með því að taka völdin af fjárhagslegri áhættustýringu Glitnis, brjóta gegn íslenskum lögum um bankarekstur og setja á svið aragrúa flókinna viðskipta.

Hvernig hin stefndu höfðu, með hlutdeild PricewaterhouseCoopers, aflað milljarðs dala frá fjárfestum í New York án þess að láta hið sanna koma í ljós um hvílíkar áhættu bankinn hafði tekið á sig gagnvart Jóni Ásgeiri og samsærismönnum hans. Hvernig viðskipti hinna stefndu ollu Glitni meira en tveggja milljarða dala tjóni og áttu drjúgan þátt í falli bankans," segir í tilkynningu frá Glitni.

Slitastjórn Glitnis stendur fyrir málaferlunum. Hún var skipuð til að annast skipti á búi bankans. Málaferlin voru undirbúin með rækilegri rannsókn þar sem farið var í saumana á stjórnun og viðskiptum Glitnis síðustu árin fyrir fall bankans.

„Fyrir hönd kröfuhafa Glitnis ætlar slitastjórnin að kosta kapps um að endurheimta eignir sem Jón Ásgeir og önnur hinna stefndu höfðu af bankanum en til þess telur hún dómstól New York-ríkis viðeigandi vettvang. Kjarni þessarar málssóknar er útboð skuldabréfa upp á einn milljarð dala. Bréfin voru seld í september 2007 til fjárfesta í New York, sem höfðu verið blekktir varðandi fjárhagslega áhættu Glitnis. Af um níu þúsund kröfuhöfum Glitnis eru nálægt 90% frá öðrum löndum en Íslandi," segir ennfremur í tilkynningu Glitnis.

Glitnir var rændur innan frá segir formaður slitastjórnar

„Gögn liggja fyrir sem styðja þá ályktun að Glitnir banki hafi verið rændur innan frá,“ segir Steinunn Guðbjartsdóttir, formaður slitastjórnar Glitnis, í tilkynningu. „Málshöfðunin í dag er jákvætt skref í þá átt að draga til ábyrgðar þann fámenna hóp sem af ásetningi eða vanrækslu átti svo ríkan þátt í falli bankans.“

Glitnir hefur þegar höfðað aðskilið mál á Íslandi á hendur sumum þeim einstaklingum sem hér eiga hlut að máli. Bankinn hefur einnig vísað málum til sérstaks saksóknara og íslenskra stjórnvalda eftir því sem við á.

Í apríl 2010 birtist skýrsla rannsóknarnefndar Alþingis um bankahrunið þar sem fram kom að hrun fjármálakerfisins á Íslandi hefði að nokkru stafað af óhóflegum áhrifum fárra viðskiptajöfra, þar á meðal Jóns Ásgeirs Jóhannessonar, í bönkum landsins.

Mál slitastjórnar Glitnis banka flytja Steptoe & Johnson LLP í New York og Slaughter and May í London.

Stefna Glitnis í heild