Áfram öskufall

Talsvert öskufall er ennþá í Landeyjum og þá einkum og helst á bæjum efst í sveitinni. Svo virðist sem tiltölulega mjór öskugeiri liggi frá Eyjafjallajökli og til vesturs, enda hefur lítil aska fallið á þeim bæjum í Landeyjum sem eru næstir sjó. Frést hefur af lítilsháttar öskufalli á suðvesturhorninu en Veðurstofan spáir öskufalli vestur af Eyjafjallajökli, allt að Faxaflóa.

„Ég er kominn hér út á tröppur og maður finnur á handabakinu hvernig askan fellur. Þetta er nú samt lítilsháttar og hefur ekki ollið neinum búsifjum. Í raun er ótrúlegt hve vel við hér í Landeyjunum höfum sloppið frá gosinu hingað til,“ sagði Jóhann Nikulásson bóndi í Stóru-Hildisey í samtali við Mbl.

Víða erum bændur í Landeyjum með mikið af útigangshrosum og hafa menn nokkrar áhyggjur af því, enda óhægt að koma öllu stóðinu á hús. Við slíkar aðstæður reyna bændur samkvæmt ráðum dýralækna þá að koma hrossunum fyrir í þröngum hólfum, þar sem þau hafa aðgang að heyi og rennandi vatni 

Rigningu sem var í Landeyjum í morgun hefur nú slotað og því fellur þar ekkert nema askan, sem er frekar fínkorna.

• 3 blogg um fréttina

Bloggað um fréttina

• KRISTJÁN SVEINBJÖRNSSON: Engin gjóska mælist í Rvk.
• Kristín H Berg Martino: Viðlagasjóður
• Njörður Helgason: Ákvörðunin getur ekki beðið.