Innlent | mbl | 14.5.2010 | 19:14

Bændum býðst að flytja sauðfé

Íslenskt sauðfé. mbl.is/Árni Torfason

Búnaðarsamband Suðurlands fékk í dag til afnota 3.000 hektara beitarsvæði í Meðallandinu sem er í umsjá Landgræðslu ríkisins. Þangað býðst bændum að flytja sauðfé en áætlað er að fljótlega sé hægt að hefja flutninga þangað. Verið er að skoða fleiri beitarhólf.

Þetta kemur fram í tilkynningu frá Bændasamtökum Íslands og Búnaðarsambandinu.

Sambandið hvetur bændur, sem geta tekið við mjólkurkúm tímabundið frá öskufallssvæðinu, til að hafa samband. Hugmyndir um miðlun á heyi og túnum séu nú ræddar á vettvangi sveitarstjórna í samvinnu við samtök bænda.

Þegar hafi verið kynnt þau úrræði sem bændum bjóðast í frumvarpi um breytt búvörulög. Þau felast m.a. í að bændum gefst kostur á að flytja kýr í önnur fjós eða draga saman búskap tímabundið. Álag á bændur er mikið og afleysingu vantar. Nauðsynlegt er að finna úrræði svo bændur geti komist úr öskukófinu af og til.

Dagana 11. og 12. maí fóru rúmlega 20 héraðs- og landsráðunautar ásamt fleirum í heimsóknir á 120 bú á áhrifasvæði eldgossins í Eyjafjallajökli. Tilgangurinn var að ræða við bændur og m.a. meta með þeim aðstæður og þörf fyrir aðstoð vegna fóðuröflunar og beitar í vor og í sumar. Úrvinnslu gagna er ekki að fullu lokið úr ferðinni en niðurstöður ættu að liggja fyrir í byrjun næstu viku.

Sú staða sem uppi er á svæðinu er mörgum bændum erfið. Öskufall og rykmengun hefur haft veruleg áhrif á daglegt líf og erfitt hefur reynst að sinna búskap með viðunandi hætti. Þó má segja að almennt séu bændur staðráðnir í að halda sínu striki eins og kostur er þrátt fyrir erfiðar aðstæður. Í samantekt ráðunauta kemur fram að fóðurbirgðir eru nægar á svæðinu og eiga að duga í nokkrar vikur hið minnsta. Engin leið er að sjálfsögðu að segja til um þróun mála því allt veltur það á goslokum.

Nánar á vef Bændasamtaka Íslands og Bændablaðsins.