Askan þyrlast upp

Askan, sem féll í Vestmannaeyjum í gær, þyrlast upp við minnsta vind, að sögn heimamanna. Lítið öskufall hefur verið þar í dag en ef vind hreyfir verður kófið svo mikið að stundum sést varla milli húsa.

Nýtt útisvæði við Sundlaug Vestmannaeyja var opnað í síðustu viku en nú hefur þurft að loka því vegna öskunnar, að því er kemur fram á vefnum Eyjafréttum. 

Ekki liggur fyrir hversu langan tíma tekur að þrífa svæðið.  Allt svæðið er klætt tartan-efni sem gæti orðið erfitt að þrífa.  Þegar askan kemst í snertingu við vatn, breytist hún í þykka leðju sem verður steypukennd þegar hún safnast saman.  Auk þess þarf að hreinsa bæði lendingarlaug og barnalaug, pottana þrjá og ekki síst rennibrautirnar.