Hvalafrumvarpi frestað til hausts

Ákveðið  var á fundi sjávarútvegs- og landbúnaðarnefndar Alþingis í dag að taka hvalafrumvarp út af málaskrá vorþings. Gert er ráð fyrir að frumvarpið verði endurflutt í haust.  

Fram kemur á vef Skessuhorns, að ástæðurnar fyrir þessari ákvörðun hafi verið tvær: að hvalafrumvarpið sé ekki forgangsmál ríkisstjórnarinnar og óheppilegt sé að skipta um veiðileyfi á miðri vertíð eins og stefndi í ef frumvarpið hefði verið samþykkt nú á vorþinginu. 

Skessuhorn segir, að Kristjáni Loftssyni, framkvæmdastjóra Hvals hf., hafi hafa verið tilkynnt um þessa ákvörðun sjávarútvegs- og landbúnaðarnefndar. Hann hafði látið að því liggja að ef umrætt frumvarp yrði samþykkt á vorþinginu myndi hann ekki senda skipin til hvalveiða í vor, en 20-25 manns hafa unnið að undirbúningi vertíðar í Hvalstöðinni í Hvalfirði í vetur.

• 2 blogg um fréttina

Bloggað um fréttina

• Haraldur Haraldsson: Hvalafrumvarpi frestað til hausts/það var viti meir !!!!!!
• S. Einar Sigurðsson: Á veiðar