Ráðherra fagnar frumkvæði SP

Árni Páll Árnason, félags- og tryggingamálaráðherra, segist  fagna frumkvæði SP-fjármögnunar til umbreytingar gengistryggðra bílalána.  SP býður upp á að lækka höfuðstól erlendra lána, bæði til einstaklinga og fyrirtækja, og breyta þeim í verðtryggð eða óverðtryggð lán í íslenskum krónum. Er meðaltalslækkunin um 28% en hún fer eftir myntsamsetningu lánanna og hvenær þau voru tekin.

Árni Páll segir á vef félagsmálaráðuneytisins, að þetta frumkvæði sýni svo ekki verði um villst að svigrúm sé til slíkra aðgerða hjá eignaleigufyrirtækjunum.

Hann segir að lagafrumvarp, sem hann hefur lagt fram á Alþingi, muni tryggja að allir lántakendur njóti þessa sama réttar, hver sem lánveitandinn er. Falli dómur Hæstaréttar um lögmæti gengistryggðra lána á þann veg að lántakendur fái meiri rétt með þeim dómi en þeim úrræðum sem leiði af tilboðum einstakra fyrirtækja eða frumvarpi ráðherra um bílalán, muni allir lántakendur njóta þess.

• 1 blogg um fréttina

Bloggað um fréttina

• Guðmundur Ásgeirsson: Sex orð um gengistryggingu #4 & #5