Þyrla lendir með veikan sjómann

Þyrla Landhelgisgæslunnar TF-GNA lenti við Landspítalann í Fossvogi rétt fyrri klukkan átta í kvöld með skipverja af þýska togaranum Kiel. Þetta kemur fram í fréttatilkynningu frá Gæslunni.

Þar kemur fram að skipið hafi verið að veiðum við A-Grænland eða um 480 sml frá Garðskaga þegar skipverjinn fékk slæman brjóstverk síðdegis á laugardag. Hafði íslenskur skipstjóri Kiel þá samband við sjóbjörgunarstöðina MRCC Grönnedal á Grænlandi, sem ekki hafði tök á að senda aðstoð vegna slæms veðurs á svæðinu og var þeim vísað á Landhelgisgæsluna. 

Þar sem langdrægi þyrlusveitar Landhelgisgæslunnar er 150 sml var skipstjóri beðinn um að halda af stað í átt til Íslands og myndi þyrla Landhelgisgæslunnar sækja sjúklinginn þegar skipið væri 150sml frá Garðskaga.

Var skipstjóri í reglulegu sambandi við stjórnstöð Landhelgisgæslunnar og þyrlulækni meðan skipið sigldi til móts við þyrluna.

TF-GNA fór í loftið frá Reykjavíkurflugvelli kl. 16:51 og var komin að togaranum kl. 18:08. Sigu stýrimaður ásamt lækni um borð í togarann þar sem sjúklingur var undirbúinn fyrir flutning. Var sjúklingur kominn um borð í TF-GNA kl. 18:25 og var hann stöðugur í flutningi. Sem fyrr segir lenti þyrlan við Landspítalann kl. 19:55.

Þess má geta að á tímabili var ráðgert að fá danska eftirlitsskipið Vædderen, sem er í Reykjavík, til að fara til móts við skipið en eftir samráð við hjartasérfræðing var hætt við það.

Þýski togarinn Kiel er gerður út af Deutsche Fishfang Union GmbH í Þýskalandi, dótturfélagi Samherja hf.

• 1 blogg um fréttina

Bloggað um fréttina

• Sigmar Þór Sveinbjörnsson: Þyrlan sannar gildi sitt