Innlent | mbl | 7.6.2010 | 22:05 | Uppfært 22:42

Lúðvík verður áfram bæjarstjóri

„Það munar litlu,“ sagði Lúðvík Geirsson bæjarstjóri þegar hann fylgdist með tölunum í Hafnarfirði. Á endanum náði hann ekki inn en hann mun eftir sem áður gegna embætti bæjarstjóra hálft kjörtímabilið. hag / Haraldur Guðjónsson

Lúðvík Geirsson mun áfram gegna embætti bæjarstjóra í Hafnarfirði hálft kjörtímabilið eða til júní 2012 en þá mun oddviti Vinstri hreyfingarinnar græns framboðs, Guðrún Ágústa Guðmundsdóttir, taka við. Lúðvík sat í baráttusætinu, 6. sæti í kosningunum og náði ekki kjöri.

Samkomulag um myndun nýs meirihluta í bæjarstjórn Hafnarfjarðar milli Samfylkingar og Vinstri hreyfingarinnar græns framboðs var staðfest á fundum flokkanna nú í kvöld. Flokkarnir hafa jafnframt samþykkt málefnasamning og ítarlega verkefnaskrá til næstu fjögurra ára auk samkomulags um skipan í kjörin embætti á kjörtímabilinu. Yfirskrift málefnasamnings Samfylkingar og Vinstri hreyfingarinnar græns framboðs í Hafnarfirði er: Velferð, lýðræði, atvinna og umhverfi fyrir fólkið í Firðinum, að því er segir í tilkynningu.

Áframhaldandi uppbygging á verðmætum atvinnusvæðum

„Nýi meirihlutinn mun leggja ríka áherslu á að standa vörð um félagsleg sjónarmið og lausnir við rekstur bæjarins og tryggja um leið ábyrga fjármálastjórnun. Þá verður lögð sérstök áhersla á að bæta möguleika Hafnfirðinga til beinnar þátttöku í stefnumótun og ákvarðanatöku um mál sem þá varðar og efnt verður til margvíslegra aðgerða til að tryggja aukin áhrif íbúanna og aðgang að stjórnkerfi og upplýsingum. Leitað verður eftir víðtæku samráði og samvinnu milli allra bæjarfulltrúa og starfsmanna bæjarins til að fylgja eftir góðum árangri og bæta enn frekar rekstur bæjarins með hagkvæmni, aðhaldi og góðu skipulagi. Meginmarkmiðið er að tryggja jákvæða rekstrarafkomu og auka á ný veltufé frá rekstri,“ segir í tilkynningu nýja meirihlutans.

„Staðinn verður vörður um velferðarþjónustu bæjarins og lögð áherslu á fjölbreytt atvinnulíf á forsendum sjálfbærrar þróunar í samræmi við fyrirhugaða umhverfis- og auðlindastefnu bæjarins. Höfuðáhersla verður lögð á áframhaldandi uppbyggingu á verðmætum atvinnusvæðum í eigu bæjarfélagsins. Áhersla verður á markvissa framþróun í leik og grunnskólum og aðkoma íbúa og starfsfólks að þróun og uppbyggingu skólastarfs verður efld. Heilbrigður lífstíll og almenn lýðheilsa verða í forgrunni í íþrótta-, æskulýðs- og tómstundastarfi og lögð áhersla á að rækta, menningararf og sérkenni Hafnarfjarðar í umhverfi, byggingum og skipulagi.

Samkomulag flokkanna varðandi stjórnsýslu bæjarfélagsins byggir á jafnræði og trausti sem er grundvöllur ábyrgs og framsækins samstarfs. Núverandi bæjarstjóri Lúðvík Geirsson mun gegna því embætti fram til júní 2012, en þá mun oddviti Vinstri hreyfingarinnar græns framboðs, Guðrún Ágústa Guðmundsdóttir taka við embætti bæjarstjóra út kjörtímabilið.“