Lappað upp á varnargarðana

Framkvæmdir hófust í dag við lagfæringar á varnargörðum fyrir ofan Svaðbælisá undir Eyjafjallajökli. Í jökulflóðinu sem kom í Svaðbælisá í upphafi eldgossins urðu miklar skemmdir á varnargörðum, túnum og öðru gróðurlendi.

Farvegur árinnar fylltist af leðju og framburði í hlaupinu og síðan hafa komið eðjuflóð í ánna. Af þessum sökum hafa varnargarðarnir verið óvirkir, að sögn Sveins Runólfssonar landgræðslustjóra.

Ríkisstjórnin samþykkti að fara í þessar neyðaraðgerðir og var tekið tilboði frá Suðurverki í framkvæmdirnar ofan og austan við Þorvaldseyri að upphæð um 20 milljónir króna. Kostnaðaráætlun var upp á 47 milljónir króna. Verkefni er unnið í samstarfi Landgræðslunnar og Vegagerðarinnar.

• 1 blogg um fréttina

Bloggað um fréttina

• Guðrún María Óskarsdóttir.: Ætla rétt að vona að varnargarðar sunnan þjóðvegar séu einnig …