Saga Breiðholts rakin á bæjarhóli

Á bæjarhóli Breiðholtsbýlisins, sem Breiðholtshverfið er kennt við,  hefur Reykjavíkurborg  nú látið reisa skilti þar sem saga Breiðholtsbýlisins er rakin í máli og myndum allt frá því er Breiðholt kom undir Viðeyjarklaustur árið 1395 þar til íbúahverfin risu í í landi Breiðholts á  árunum 1960 til 1980. 

Meðal fróðleiksmola má nefna að bæjarstjórn Reykjavíkur keypti jarðirnar Breiðholt, Ártún og Árbæ árið 1906 til þess að tryggja sér aðgang að vatni Elliðaánna fyrir vatnsveitur bæjarins. En árið 1923 var Breiðholt orðið hluti af lögsagnarumdæmi Reykjavíkur. Hið forna bæjarstæði Breiðholts ásamt kirkju og kirkjugarði var friðlýst árið 1981, samkvæmt fréttatilkynningu.

„Menningar- og ferðamálaráð hefur beitt sér fyrir átaki í menningarmerkingum undanfarið með nýju og samræmdu útliti eins og þegar má sjá við Höfða og í görðum Lækjargötu og Fríkirkjuvegs við Bernhöftstorfu, í Mæðragarði, Hallargarði og Hljómskálagarði. Kjartan Magnússon hrinti verkefninu úr vör og Áslaug Friðriksdóttir núverandi formaður ráðsins hefur einnig lagt því lið.

Öll skiltin eru með fróðlegri sögu og skemmtilegum gömlum ljósmyndum og eru bæði á íslensku og ensku. Ráðið beitti sér fyrir að gerð var rannsókn til að kortleggja þörfina á merkingum og komu rúmlega 500 tillögur úr rannsókninni.

Í kjölfarið það til  samkeppni um samræmt útlit menningarmerkinga í borginni og varð  Finnur Malmquist, grafískur hönnuður fyrir valinu. Minjasafn Reykjavíkur hefur lagt til fróðleik þann er lesa má af skiltunum og myndirnar koma bæði frá Ljósmyndasafni Reykjavíkur og Þjóðminjasafninu. Garðyrkjustjóri hefir fundið þeim stað og komið í jörð. Fleiri menningarmerkingar á vegum ráðsins eru í smíðum sem koma upp á næstunni," segir í fréttatilkynningu.

• 1 blogg um fréttina

Bloggað um fréttina

• Haraldur Haraldsson: Saga Breiðholts rakin á bæjarhóli/ þetta mjög svo gott og …