Hrósar Íslendingum

Navi Pillay, mannréttindafulltrúi Sameinuðu þjóðanna, hrósar íslensku ríkisstjórninni sérstaklega fyrir binda í lög að heimilt skuli að gefa saman samkynhneigð pör á Íslandi. Ísland sé aðeins níunda landið í heiminum til að stíga þetta skref. Pillay var í opinberri heimsókn á Íslandi fyrir helgi.

Vísaði hún þar til breytinga á hjúskaparlögum sem Alþingi samþykkti nýlega. Sjá má frumvarpið hér og feril málsins hér.

Fjallað er um málið á vef Sameinuðu þjóðanna en þar segir að hjónabönd samkynhneigðra séu lögleg í Belgíu, Kanada, Hollandi, Noregi, Portúgal, Suður Afríku, Spáni og Svíþjóð, ásamt nokkrum sambandsríkjum Bandaríkjanna og Mexíkó.

Pillay jók einnig lofsorði á íslensk stjórnvöld fyrir að hafa styrkt sjálfstæði dómstóla og aukið tjáningarfrelsi.

Hún var sem fyrr segir í opinberri heimsókn hér á landi fyrir helgi en þetta mun vera í fyrsta sinn sem mannréttindafulltrúi SÞ kemur hingað til lands.

Pillay hitti marga að máli í heimsókn sinni, þar með talið Össur Skarphéðinsson utanríkisráðherra, Rögnu Árnadóttur dómsmálaráðherra og fjölda fræðimanna og annarra áhugamanna um mannréttindi.

Navi Pillay.

• 2 blogg um fréttina

Bloggað um fréttina

• Óskar Sigurðsson: Skömminni sýndur sómi
• Kristin stjórnmálasamtök: Umdeilt hjónaband meðal Sameinuðu þjóðanna