Bílaleigur gætu þurft að greiða sektirnar

Verði frumvarp um ný umferðarlög að lögum óbreytt fær lögregla heimild til að sekta bílaleigur fyrir hraðakstursbrot leigutaka sem mynduð eru með löggæslumyndavélum.

Slík breyting ætti m.a. að leiða til betri innheimtu hraðasekta erlendra ökumanna á bílaleigubílum.

Hjálmar Pétursson, framkvæmdastjóri AVIS bílaleigu, segir þetta slæmt mál. „Erlendir ökumenn sem taka hjá okkur bíla fá ýtarlegar upplýsingar um hvaða umferðarreglur gilda og meðal annars er margtuggið ofan í þá hver er hámarkshraðinn á vegum þannig að mér finnst frekar hæpið að við eigum að fara að bera fjárhagslega ábyrgð ef þeir brjóta af sér.“