„Skynsamlegt og sanngjarnt“
Setja bókamerki
„Hinir nýju forystumenn Seðlabankans og Fjármálaeftirlitsins hafa sent út tilmæli um gengistryggðu lánin, hversu með skuli fara þangað til dómstólar úrskurða annað. Annaðhvort séu notaðir lægstu vextir óverðtryggt eða lægstu vextir verðtryggt. Þetta er góð lína og einboðið að lánveitendur og lántakendur fari eftir þessu,“ segir Mörður Árnason, þingmaður Samfylkingarinnar, á heimasíðu sinni í dag.
Mörður líkir þessu við venjuleg neytendaviðskipti. Að vísu sé ekki hægt að endurgreiða neytanda þessa gölluðu vöru en hins vegar eðlilegt að láta hann hafa aðra eins vöru í staðinn, annaðhvort verðtryggt lán eða óverðtryggt með hærri vöxtum.
Hann segir að tilmæli Seðlabankans og Fjármálaeftirlitsins sé í grundvallaratriðum bæði skynsamleg og sanngjörn, en Mörður hefur áður lýst þeirri skoðun sinni að breyta ætti gengistryggðum lánum yfir í verðtryggð.
„Nú hefjast auðvitað málaferli, en líklegust og æskilegust lok þeirra eru í þessum dúr. Skelfing hinna gengistryggðu hefur þá linast, og menn geta aftur komið sér að verkum við það annarsvegar að bæta stöðu hinna verst settu og hinsvegar að snúa hjólunum í gang þannig að atvinnuleysi hverfi og kaupmáttur aukist – á leiðinni í Nýja Ísland með lærdóma hrunsins í vegarnesti,“ segir Mörður.
Ekkert ferðaveður og vegalokanir á jóladag
Segir umsókn að ESB vera óvirka
Í þögn hjartans
Ofmeta sparnað í stjórnarráðinu
Strandveiðar „efnahagsleg sóun“
Spá 13-18 stiga frosti í borginni