Innlent | mbl | 30.6.2010 | 17:55

Tónleikar færðir vegna veðurs

Tónlistarveislan er hápunktur Inspired by Iceland en mun nú fara fram í Reykjavík

Tónlistarveislan ,,Iceland Inspires” hefur verið færð frá Hamragörðum undir Eyjafjöllum til Reykjavíkur, í Hljómskálagarðinn. Von er á óvenju krappri lægð við suðurströndina á morgun og þykir því ekki fært að ráðast í tónleikahald á þessum slóðum.

Fjöldi tónlistarmanna mun koma fram á tónleikunum þ.á m. Damien Rice og Glen Hansard sem eru komnir til landsins vegna tónleikanna. Þá verða tónleikarnir sendir út á netinu ásamt atriðum tónlistarmanna sem sáu sér ekki fært að koma fram á tónleikunum sjálfum.

Í fréttatilkynningu frá iðnaðarráðuneytinu segir:

„Tónleikarnir ,,Iceland inspires”, sem halda átti á morgun, fimmtudaginn 1. júlí, að Hamragörðum undir Eyjafjöllum, hafa eftir samráð við veðurfræðinga verið færðir til Reykjavíkur. Óvenju kröpp lægð á þessum árstíma nálgast nú suðurströnd landsins og er spáð þvílíkri veðurhæð á köflum að ekki er talið fært að ráðast í tónleikahald á þessum slóðum vegna veðurs. Tónleikarnir verða haldnir í Hljómskálagarðinum í Reykjavík og hefjast kl. 20:00 annaðkvöld.

,,Iceland Inspires” tónleikarnir eru þriggja tíma tónlistarveisla sem verður einnig í beinni útsendingu á vefsíðu átaksins www.inspiredbyiceland.com. ,,Inspired by Iceland” átakið hefur vakið eftirtekt víða um heim og vefsíðan nýtur mikilla vinsælda, sem ætlunin er að nýta til enn meiri útbreiðslu.

Á tónleikunum koma m.a. fram Spiritualized Acoustic Mainlines með íslenskri strengjasveit og kór, Damien Rice, Glen Hansard, Seabear, Amiina, Dikta, Steindór Andersen, Lay Low, Hilmar Örn Hilmarsson, Mammút, Pondus, Hafdís Huld, Páll á Húsafelli og Parabólur ásamt fleirum.

Mynd - og hljóðupptökur með Gus Gus, Hjaltalín, For a Minor Reflection og Retro Stefson verða einnig í beinu útsendingunni á netinu. Upptökurnar eru gerðar sérstaklega fyrir útsendinguna á nokkrum vel völdum stöðum í íslenskri náttúru

,,Iceland Inspires” tónleikarnir eru öllum opnir án endurgjalds. Ungir sem aldnir eru hvattir til að mæta.

Tónleikarnir hefjast stundvíslega kl. 20:00 og lýkur kl. 23:00.“