Innlent | mbl | 30.6.2010 | 16:08

Vilja skoða lagasetningu

mbl.is

Samtök fjármálafyrirtækja harma þá erfiðu stöðu sem margir viðskiptavina þeirra eru í vegna erlendra lána og þá réttaróvissu sem um þau ríkir og vona að úr henni verði skorið hið fyrsta í Hæstarétti. Vilja þau að skoðað verði hvort hægt sé að flýta dómstólaferli með lagasetningu.

Segir í tilkynningu frá Samtökum fjármálafyrirtækja (SFF) að með tilmælunum hafi Seðlabanki Íslands og Fjármálaeftirlitið skorið úr um mikilvægt atriði sem óvissa ríkti um í kjölfar dóma Hæstaréttar.

Óvissa ríkir um hvaða samningar falli undir tilmælin

„SFF telja mikilvægt að þessari óvissu hafi verið eytt en árétta að enn ríkir óvissa um hvaða lánssamningar falli undir tilmælin. SFF hvetja stjórnvöld til að tryggja að sem allra fyrst verði skorið endanlega úr um þau óvissuatriði sem uppi eru. Miklu skiptir að dómstólar landsins vinni þau mál hratt og örugglega.

Skoða þarf á næstu dögum hvort hægt sé að flýta því dómstólaferli með lagasetningu eða öðrum hætti. Samtök fjármálafyrirtækja og aðildarfyrirtæki þeirra harma þá erfiðu stöðu sem margir viðskiptavina þeirra eru í vegna erlendra lána og þá réttaróvissu sem um þau ríkir og vona að úr henni verði skorið hið fyrsta í Hæstarétti," segir í tilkynningu frá SFF.