Innlent | mbl | 13.7.2010 | 13:36

Beittu sér ekki óeðlilega í Magma-máli

Unnur G. Kristjánsdóttir.

Unnur Kristjánsdóttir, formaður nefndar um erlenda fjárfestingu, segir að enginn starfsmaður efnahags- og viðskiptaráðuneytisins hafi beitt sér óeðlilega í Magma-málinu eða reynt að hafa áhrif á niðurstöðu nefndarinnar. Þvert á móti hafi nefndin notið velvildar í ráðuneytinu.

Þetta kemur fram í yfirlýsingu, sem Unnur hefur sent frá sér. Yfirlýsingin er eftirfarandi:

Vegna ummæla Silju Báru Ómarsdóttur fulltrúa VG í nefnd um erlenda fjárfestingu um samskipti okkar við starfsmenn Efnahags- og viðskiptaráðuneytisins skal tekið fram að samskipti milli mín og nefndarinnar í heild við starfsmenn ráðuneytisins hafa verið í góðum og eðlilegum farvegi. Sannarlega hefur mér heyrst að einhverjir starfsmenn og hún hafa ekki verið sammála í einhverjum efnum en tel það ekki hafa nein áhrif á Magma-málið
Sá háttur er hafður á starfsemi nefndarinnar að ráðuneytið er aðsetur nefndarinnar og þar höfum við aðgang að sérstökum starfsmanni sem jafnframt er starfsmaður ráðuneytisins. Nefndin getur óskað eftir upplýsingum og ráðgjöf frá starfsmönnum ráðuneytisins. Nefnd um erlenda fjárfestingu starfar fjárhagslega á vegum Efnahags- og viðskiptaráðuneytisins og heldur fundi þar. Haft var samráð við ráðuneytið um til hvaða sérfræðinga var leitað til starfa fyrir nefndina en nefndin eða formaður bera ábyrgð á hverjir voru valdir. Sérfræðingar þeir sem veittu álit og ráðgjöf eru Dóra Guðmundsdóttir hjá Lagastofnun HÍ, Kristín Haraldsdóttir hjá Auðlindastofnun HR og Dóra Sif Tynes sérfræðingur í Evrópurétti. Enginn starfsmaður ráðuneytisins hefur beitt sér óeðlilega Magma-málinu né reynt að hafa áhrif á niðurstöðu nefndarinnar, þvert á móti hefur nefndin notið velvildar í ráðuneytinu.
Í tilefni af ofanrituðu og ummæla Atla Gíslason þingmaður VG í hádegisfréttum RÚV að það samstarf okkar við ráðuneytið væri of náið og eitthvað óeðlilegt vari í gangi vil ég taka fram að svo er ekki.