Slökkviliðsmenn boða til verkfalls

Útlit er fyrir að verkfallsaðgerðir slökkviliðsmanna verði að veruleika í næstu viku.

Landssamband slökkviliðs- og sjúkraflutningamanna boðar til verkfalls föstudaginn 23. júlí nema samningar takist um bætt launakjör félagsmanna.

Viðræður hafa staðið yfir um nokkurt skeið á milli launanefndar sveitarfélaga og slökkviliðsmanna en upp úr viðræðunum slitnaði í dag.

Jón Viðar Matthíasson, slökkviliðsstjóri á höfuðborgarsvæðinu, segir stöðuna dapurlega. Verði verkfallið að veruleika muni slökkviliðið aðeins sinna neyðarútköllum. Mun færri menn verði á vakt og viðbrögð verði lélegri.

Hann vonast til þess að viðræður hefjist að nýju svo hægt verði að leysa málið. 

Samkvæmt upplýsingum frá Landssambandi slökkviliðs- og sjúkraflutningamanna samþykkti meirihluti félagsmanna að hefja verkfallsaðgerðir fáist ekki viðunandi niðurstaða í málið.

Slíkt verkfall hefði alvarlegar afleiðingar á samfélagið.  Til dæmis yrðu aðeins 22 menn á vakt í einu á öllu höfuðborgarsvæðinu.

Verkfallið mun standa milli klukkan 8 til 16 dag hvern og verður einungis neyðartilfellum sinnt. Ekki verður farið í útköll sem þola bið. 

Náist ekki samningar verður boðað til allsherjarverkfalls í september.

Slökkviliðsmenn hafa aldrei farið í verkfall í líkingu við það sem nú er boðað.

Slökkviliðs- og sjúkraflutningamenn sýna samstöðu með samninganefnd sinni. Júlíus Sigurjónsson

• 5 blogg um fréttina

Bloggað um fréttina

• Guðmundur Júlíusson: Slökkviliðsmenn í verkfall ???
• Axel Jóhann Hallgrímsson: Snillingar á ferð
• Ingibjörg Guðrún Magnúsdóttir: Skammarleg staða fyrir Ráðamenn..
• Anna Dóra Gunnarsdóttir: Nú væri illt til þess að vita
• Sigurður Haraldsson: Það sem yfir okkur er að koma er!