Bongóblíða í borginni

Veðrið lék við landsmenn á Suður- og Vesturlandi í dag. Borgarbúar fóru ekki varhluta af blíðunni, en þar fór hitinn upp í 20 stig. Sannkölluð bongóblíða. Skal því engan undra að fjölmargir hafi lagt leið sína í miðbæinn til þess að sleikja sólina, sýna sig og sjá aðra. 

Ferðahugur er einnig í landsmönnum sem eru á ferð og flugi þessa helgina. Víða eru skemmtanir í fullum gangi, m.a. Húnavaka á Blönduósi og Bryggjusöngur á Stokkseyri svo örfá dæmi séu nefnd.