Bæjarstjórnin fundaði um borð í Herjólfi

Bæjarstjórn Vestmannaeyja hélt formlegan fund um borð í Herjólfi á leiðinni milli Eyja og Landeyjahafnar nú síðdegis. Í samþykkt bæjarstjórnar segir m.a. að það sé von og trú bæjarstjórnar að þjónusta Landeyjahafnar verði til verulegra hagsbóta fyrir samfélagið í Vestmannaeyjum  með auknum lífsgæðum bæjarbúa og velsæld.

Samþykktin er eftirfarandi:

„Á vígsludegi Landeyjahafnar fagnar Bæjarstjórn Vestmannaeyja þeim miklu samgöngubótum sem falist geta í tilkomu hennar.  Nálægðin  milli Vestmannaeyjahafnar og Landeyjahafnar styttir ekki einungis ferðatíma milli lands og Eyja heldur gefur hún einnig tækifæri á tíðari og hagkvæmari ferðum en áður hefur þekkst í samgöngum á sjó við Vestmannaeyjar.  Í því verður hin raunverulega samgöngubót fólgin. Bæjarstjórn Vestmannaeyja þakkar þeim fjölmörgu  sem lagt hafa lóð sín á þá vogarskál sem gert hefur Landeyjahöfn að veruleika. Það er von og trú bæjarstjórnar að þjónusta Landeyjahafnar verði til verulegra hagsbóta fyrir samfélagið í Vestmannaeyjum  með auknum lífsgæðum bæjarbúa og velsæld. Þannig samþykkt á aukafundi bæjarstjórnar um borð í m/s Herjólfi á leið til Landeyjahafnar 20. júlí 2010."

Farþegar í Herjólfi ganga í land í Landeyjahöfn síðdegis eftir fyrstu formlegu ferð skipsins þangað. mbl.is/Hjalti Geir

• 1 blogg um fréttina

Bloggað um fréttina

• Gísli Foster Hjartarson: Ég veit ekki.....