Orkuaudlind.is liggur niðri

Vefsíðan orkuaudlind.is, þar sem undirskriftum er safnað til stuðnings því að horfið verði frá kaupum Magma Energy í hlut GGE í HS Orku, liggur niðri.

Jón Þórisson, einn forsprakka síðunnar, segist ekki vita hver vandinn er. „Hugsanlega er þetta árás,  hugsanlega er þetta tæknilegur galli hjá Skýrr. Við vonum að það sé málið,“ segir Jón en síðan er hýst hjá Skýrr.

„Það er búið að vinna í þessu síðan í gær en ekkert komið í lag. Ég kann nú ekki skýringarnar á tæknimálunum en þetta er alvarlegt mál,“ segir Jón sem kveður málið undarlegt.

„Það merkilegt að þetta er eina síðan sem virkar ekki. Þetta er eina síðan sem á eitthvað brýnt erindi við landsmenn akkúrat núna. Maður veltir því fyrir sér hvort þetta sé tilviljun eða eitthvað annað,“ segir Jón sem segir undirskriftasöfnunina hafa gengið vel fram að þessu.

„Það er ljóst að hagsmunir eru miklir fyrir þá sem eru ósammála okkur og maður veltir fyrir sér hvað fólk er tilbúið að gera,“ segir Jón en tekur fram að gögnin eru trygg.

• 1 blogg um fréttina

Bloggað um fréttina

• Haraldur Haraldsson: Orkuaudlindir.is liggur niðri///Málið verður skoðað án undirskifta,allavega styttur leigutímin!!!!