Blóð vantar í Blóðbankann

Skortur er á blóði í Blóðbankanum og hvetur bankinn blóðgjafa að gefa sig fram.

Í tilkynningu frá Blóðbankanum hvetur hann blóðgjafa til að koma við í bankanum sínum áður en þeir fara í frí og gefa blóð. „Birgðir af blóði í O blóðflokkunum eru lægri en þurfa þykir og sérstaklega vantar O Rhesus negativt blóð, en slíkt blóð þarf ætíð að vera til taks í bráðatilvikum og slysum.  O Rhesus negatívt blóð er jafnframt mikið notað fyrir nýbura, ungabörn og fyrir sjúklinga af sama blóðflokki. “

Blóðbankinn hvetur sérstaklega virka blóðgjafa til að koma í þessari viku. Nýir blóðgjafar eru hvattir til að koma fremur á öðrum tímum, vegna mikils annríkis þessa viku.  Allar aðrar vikur eru nýir blóðgjafar velkomnir að skrá sig sem blóðgjafa.

Blóðbankabíllinn er ekki á ferðinni fyrr en í lok ágúst. Líkt og undanfarin ár er hann ekki í ferðum yfir sumartímann vegna sparnaðaraðgerða.

Blóðbankinn er ábyrgur fyrir allri söfnun og vinnslu blóðs hér á landi. Á Íslandi eru 10.000 virkir blóðgjafar.  Árlega er safnað rúmlega 15.000 einingum heilblóðs.

Núna í aðdraganda verslunarmannahelgar er sérlega mikilvægt að eiga nægilegar blóðbirgðir, og því mun Blóðbankinn á Snorrabraut lengja afgreiðslutíma sinn, sem verður eftirfarandi þessa viku:

mánudagur 26. júlí        11-19
þriðjudagur 27. júlí        08-17
miðvikudagur 28. júlí        08-17
fimmtudagur 29. júlí         08-19
föstudagur 30. júlí        08-12


Blóðbankinn er ennfremur með starfsstöð á Akureyri

• 1 blogg um fréttina

Bloggað um fréttina

• Jóhann Elíasson: ALLIR SEM GETA ERU HVATTIR TIL AÐ LEGGJA BLÓÐBANKANUM LIÐ!!!!!!!