Óbreytt verð til sauðfjárbænda

Sláturfélag Suðurlands verður með óbreytt verð til bænda fyrir lambakjöt þegar í sláturstíðin hefst í haust. Þetta kemur fram í fréttabréfi SS þar sem fjallað er um haustslátrun.  Verðið hækkaði hins vegar á síðasta ári.

SS er fyrsta fyrirtækið til að tilkynna um verð á kjöti í sláturtíðinni í haust. Búist er við að þetta verð gefi vísbendingar um hvað aðrir sláturleyfishafar ætli að gera.

Sláturleyfishafar hafa fengið sem nemur 35,25 kr/ kg greitt frá Bændasamtökunum í vaxta- og geymslugjald. Þessir fjármunir munu nú fara beint til bænda en ekki í gegnum afurðaverðið hjá sláturleyfishöfum
og lækkar afurðaverð því sem þessu nemur. Þetta þýðir óbreytt afurðaverð til bænda.

Í fréttabréfinu segir að mikil verðsamkeppni sé á kjötmarkaðnum. Meðalsöluverð SS sé t.d. það sama fyrir kindakjöt frá hausti 2009 og árið 2008. Það þýði að sú hækkun sem varð til bænda í fyrra með því að greiða innanlandsverð fyrir útflutning og kostnaðarauki vegna hækkunar á sláturkostnaði hafi ekki náðst í söluverði og afkoma af sölu kindakjöts
af þeim sökum slök.

Flytja þarf út um 30% framleiðslunnar. Það hefur hjálpað útflutningnum að krónan hefur verið veik, en hún er núna heldur að styrkjast.

Í verðskrá SS er tekin upp sú nýbreytni að afurðaverðið er breytilegt eftir tímabilum, hæst fyrstu vikur sláturtíðarinnar en lækkar svo er líður á sláturtíðina. Verðið fer úr 110% af fullu verði niður í 96%.

Á vef sauðfjárbænda segir að sauðfjárbændur séu að verða fyrir kjaraskerðingu. Bent er á að verðbólga mælist nú 5,7% á ársgrunni. Beingreiðslur til bænda munu einungis hækka um 2% á þessu ári. Til viðbótar er óvissa um mótframlag ríkisins til Lífeyrissjóðs bænda og tryggingargjald hefur hækkað verulega síðustu misseri. Þetta þýðir kjaraskerðingu fyrir sauðfjárbændur á næstu misserum.

• 2 blogg um fréttina

Bloggað um fréttina

• Haraldur Haraldsson: Óbreytt verð til sauðfjárbænda////þetta gengur einfaldlega ekki upp!!!!!
• Reynir W Lord: Þá spyr ég!