Fundu sokkið skip við Ísland

Flak breska olíuskipsins SS Shirvan, sem þýskur kafbátur sökkti árið 1944, er fundið. Sjómælingaskip Landhelgisgæslunnar fann flakið eftir að ábending barst frá sjómönnum um að eitthvað kynni að leynast á hafsbotni, skammt undan Garðskaga.

Fyrir rúmu ári síðan var sjómælingaskipið við leit að flaki Goðafoss og fann þúst, sem talið var að tilheyrði Shirvan. Á þriðjudaginn fékkst það staðfest.

Notast var við íslenskan kafbát við leitina að flakinu, en það liggur á um hundrað metra dýpi. Af myndum kafbátarins að dæma hefur skipið brotnað í þrjá hluta og er illa farið.

Shirvan var grandað í sömu árás og Goðafoss, þann 10. nóvember 1944. Skipið villtist af leið sökum óveðurs og lenti í klóm þýsks kafbáts sem grandaði því með tundurskeyti. Mannlaust skipið rak í ljósum logum út á sjó uns það sökk til botns. Þar hefur það legið í felum gegnum árin og ekki fundist fyrr en nú.

• 1 blogg um fréttina

Bloggað um fréttina

• Sigurður Sigurðsson: Vá ég hélt að það væri átt við þjóðarskútuna