Innlent | mbl | 29.7.2010 | 10:54 | Uppfært 11:42

Hvalfjarðargöng fá falleinkunn

Ekið í Hvalfjarðargöngunum. mbl.is/Júlíus

Hvalfjarðargöngin fá falleinkunn hjá Samtökum þýskra bíleigenda (ADAC) sem könnuðu öryggismál í 26 jarðgöngum í Evrópu. Samtökin segja að fern göng hafi fengið rauða spjaldið. Hvalfjarðargöngin komi hins vegar verst út af þeim.

Ný jarðgöng í Frakklandi, sem eru skammt frá París, komu best út í könnuninni hvað varðar öryggismál. ADAC segir að þau setji í raun nýtt viðmið.

ADAC segir aftur á móti að Hvalfjarðargöngin standist ekki þær öryggiskröfur sem menn geri í Evrópu. Ljóst sé að úrbóta sé þörf, enda göngin á botninum skv. könnuninni.

Þeir þættir sem koma verst út úr könnuninni er viðbúnaður ef neyðartilvik koma upp, viðbrögð við eldi, flótta- og útgönguleiðir og loftræsting í göngunum. Fram kemur, að ekkert sjálfvirkt viðvörunarkerfi sé í Hvalfjarðargöngum, sem þýði, að loka þurfi göngunum handvirkt og hringja á slökkvilið ef eldur kemur upp og þannig geti dýrmætur tími tapast.

Aðstæður í 16 göngum eru sagðar mjög góðar, góðar í fernum og viðunandi í tvennum. Könnunin var gerð í 13 Evrópulöndum undir merkjum EuroTap (European Tunnel Assessment Programme).

Fram kemur jafnframt, að aðstæður í mörgum jarðgöngum í Evrópu séu þannig, að þau muni ekki geta uppfyllt nýjar evrópskar öryggisreglur, sem taka gildi árið 2014.

Algengustu ágallarnir, sem taldir eru á evrópskum jarðgöngum, eru að þar skorti hátalara svo hægt sé að vara ökumenn við slysum, skortur sé á brunahönum og lýsing oft léleg.

Auk Hvalfjarðarganganna náði úttektin til jarðganga í Austurríki, Belgíu, Króatíu, Tékklandi, Frakklandi, Þýskalandi, Ítalíu, Hollandi, Noregi, Slóveníu, Spánar og Sviss.

Könnun ADAC.

Umfjöllun í Focus.