Þúsundir á Hinseginhátíð

Mörg þúsund manns eru nú við Arnarhól á Hinseginhátíð. Hátíðin fer vel fram. Fyrr í dag fór fram gleðiganga niður Laugaveg.

Jón Gnarr, borgarstjóri,  leiddi hina árvissu gleðigöngu Hinsegin daga í dag sem er sú tólfta sem haldin er á Íslandi.  Borgarstjóri var í hátíðarklæðum í tilefni dagsins og var á vel skreyttum bíl frá gatnadeild Reykjavíkurborgar. Með borgarstjóra í för voru nokkrir borgarfulltrúar í Reykjavík, og skörtuðu þeir einnig sínu fínasta pússi.

„Með þátttöku Reykjavíkurborgar í gleðigöngunni viljum við sýna hommum og lesbíum á Íslandi virðingu og stuðning,“ segir Jón Gnarr borgarstjóri.

Gangan í dag var ein sú fjölmennasta frá upphafi og gekk afar vel að sögn aðstandenda.

Meðal skemmtikrafta á Hinseginhátíð eru Elektra, Bergþór Pálsson, Haffi Haff, Sigga Beinteins, Friðrik Ómar og Páll Óskar sem stjórnar fjörinu.