Saksóknari rannsaki Byggðastofnun

Stjórn Frjálslynda flokksins telur nauðsynlegt að sérstakur saksóknari rannsaki vafasamar lánveitingar Byggðastofnunar. Í tilkynningu frá flokknum segir að svo virðist vera sem fyrrverandi stjórn og forstjóri stofnunarinnar hafi  farið á svig við gildandi lög og heimilað að aflaheimildir væru vistaðar í skúffufyrirtækjum en ekki á skipum eins og lög kveði á um.

Þá segir að einungis lítill hluti veiðiheimilda í rækju hafi verið nýttur til veiða og verðmætasköpunar en þess í stað hafi kvótinn verið „misnotaður sem skiptimynt í braski“.

Stjórn Frjálslynda flokksins telur sömuleiðis að full þörf sé á að rannsaka starfsemi Byggðastofnunar í gegnum tíðina. „Rannsóknin ætti meðal annars að taka til starfslokasamninga við fyrrum forstjóra stofnunarinnar, forsendur lánveitinga og afskrifta lána sem oft virðast hafa verið veitt gegn ótryggum veðum.“
 

• 1 blogg um fréttina

Bloggað um fréttina

• Sigurður Haraldsson: Alstaðar.