Skylda að merkja sérstaklega erfðabreytt matvæli

Jón Bjarnason, sjávarútvegs- og landbúnaðarráðherra, hefur ákveðið að setja reglugerð, sem kveður á um skyldu til að merkja sérstaklega allar matvörur sem markaðsfærðar eru hér á landi og innihalda hráefni úr lífverum sem flokkast undir að vera erfðabreyttar.

Stuðst verður við samsvarandi reglur Norðmanna og mun ný reglugerð taka gildi fljótlega, með nauðsynlegum aðlögunartíma fyrir framleiðendur og söluaðila. Undirbúningur að setningu reglna í þessum tilgangi hefur staðið yfir í ráðuneytinu um alllanga hríð, samkvæmt fréttatilkynningu.

Í samstarfsyfirlýsingu ríkisstjórnarinnar er því lýst yfir að tryggja skuli „að erfðabreytt matvæli séu merkt þannig að neytendum sé ljóst innihald matvæla við innkaup.”

„Það er mat Jóns Bjarnasonar, sjávarútvegs- og landbúnaðarráðherra  að með tilkomu þessara reglna verði komin heildstæð löggjöf um merkingar efðabreyttra matvæla, en eins og staðan er nú er Ísland eina landið í Vestur-Evrópu sem ekki hefur sett sér heildstæðar reglur á þessu sviði.

Með innleiðingu reglnanna aukast möguleikar neytenda verulega til að taka upplýstar ákvarðanir með hliðsjón af innihaldi fæðu. Hér er því um mjög mikilvægt neytendamál að ræða, sem unnið verður í góðu samráði við Neytendasamtökin, en þau hafa verið mjög hvetjandi í þessum efnum," segir í fréttatilkynningu frá ráðuneytinu.

• 5 blogg um fréttina

Bloggað um fréttina

• Davíð Oddsson: Hvers vegna ekki að taka þetta alla leið?
• Axel Jóhann Hallgrímsson: Það hlýtur að sama skapi...
• Arnar Pálsson: Hver er hættan af erfðabreyttum lífverum?
• Árni Þór Björnsson: Hvers vegna ?
• Guðrún María Óskarsdóttir.: Löngu tímabært, en hvað með þróun lífræns landbúnaðar ?