Staðir Bjarkar staðlausir stafir

Forsvarsmenn HS Orku og Magma Energy á Íslandi segja Björk ekki fara með rétt mál í Sunnudagsmogganum þar sem hún telur upp staði sem fyrirtækin eiga að hafa sýnt áhuga.

Í viðtalinu segir Björk að Magma hefði sýnt áhuga á fimm stöðum í landinu, Hrunamannaafrétti, Öræfum, Reykjahlíð, Vogum, Bjarnarflagsvirkjun, Kerlingarfjöllum og Krísuvík.

Júlíus Jónsson, forstjóri HS Orku, segir lítið til í máli Bjarkar. „Ég veit ekki um nein áform önnur en þau sem eru hér hjá HS Orku. Þau eru öll uppi á borðinu. Þetta er ekkert sem hefur verið rætt hér. Ekki um nokkurn skapaðan hlut. HS Orka starfar í Krísuvík og á Reykjanesi,“ segir Júlíus sem kveðst ekki vita af öðrum áformum Magma Energy.

Ásgeir Margeirsson, forstjóri Magma Energy á Íslandi, segir upptalningu Bjarkar ekki eiga við rök að styðjast, að því er fram kemur í umfjöllun um mál þetta í Morgunblaðinu í dag.