Fann vikurmola frá Eyjafjallajökli í Noregi

Norðmaður, sem á sumarhús á eyjunni Tromøy syðst í Noregi, segist hafa fundið vikurmola sem án efa eigi rætur sínar að rekja til eldgossins í Eyjafjallajökli í vor. 

Jon Einar Tellefsen er jarðfræðingur sem býr í Stafangri. Hann segir við blaðið Agderposten, að þegar hann gekk um fjöruna í Tromøy ásamt Sissel konu sinni hafi þau fundið vikursteina, sem sjórinn hafi örugglega borið með sér frá Íslandi í sumar um 15 þúsund km vegalengd.

Um er að ræða létta steina sem eru á stærð við golfkúlur. Tellefsen segir að  það sé eðlilegt að vikurmolar berist að vesturströnd Noregs frá Íslandi en óvenjulegt sé að þeir fari svona langt suður og austur.

Frétt Agderpóstsins

• 1 blogg um fréttina

Bloggað um fréttina

• Magnús Óskar Ingvarsson: 15 þúsund kílómetrar?