Skreppa í sund til Eyja

Fjölmargir hafa lagt leið sína til Vestmannaeyja síðan Landeyjahöfn var tekin í notkun. Bæði Íslendingar og erlendir ferðamenn sækja eyjarnar heim en mest aukning hefur verið í dagsferðum.

„Við höfum fengið hingað fullt af Íslendingum sem aldrei hafa komið áður til Vestmannaeyja,“ segir Kristín Jóhannsdóttir, menningar- og markaðsfulltrúi Vestmannaeyjabæjar. Hún segir nokkuð um að sumarbústaðaeigendur á Suðurlandi komi í dagsferðir og sæki þá söfnin og veitingastaðina. Sumir komi jafnvel aðeins til að kíkja í sund en í vor var opnuð ný sundlaug í Vestmannaeyjum sem Kristín segir eina þá glæsilegustu á landinu.

Um 40 þúsund farþegar hafa farið milli Landeyjahafnar og Vestmannaeyja frá því Landeyjahöfn var tekin í notkun 21. júlí síðastliðinn, að því er fram kemur í Morgunblaðinu í dag.