Taka þarf harðar á brotum á banni við áfengisauglýsingum

Taka þarf harðar á brotum gegn banni við áfengisauglýsingum á Íslandi. Þetta kom m.a fram í setningarávarpi heilbrigðisráðherra, Álfheiðar Ingadóttur, á norrænni ráðstefnu um áfengis- og fíkniefnarannsóknir, sem sett var í Reykjavík í gær.

Norræna velferðarstofnunin (NVC) og rannsóknarnetið MISCHMASCH standa fyrir ráðstefnunni, en NordForsk styður hana. Ráðstefna sem þessi er haldin á tveggja ára fresti, en þemað í ár er neysluvenjur og lífsstíll, samkvæmt því sem fram kemur á vef heilbrigðisráðuneytisins.

Í ávarpi sínu benti Álfheiður meðal annars á að áfengisneysla á hvern íbúa, 15 ára og eldri, hefði næstum tvöfaldast á Íslandi frá 1980 til 2007, en það ár neytti hver landsmaður að meðaltali 7,5 lítra af hreinu áfengi.  Í heilbrigðisáætlun til ársins 2010 hefði það verið eitt af helstu markmiðunum að minnka neysluna í fimm lítra á hvern landsmann. Þótt þetta markmið hefði ekki náð fram að ganga hefði sá árangur náðst að undanfarin ár hefði dregið úr áfengisneyslu ungmenna.

• 3 blogg um fréttina

Bloggað um fréttina

• Axel Jóhann Hallgrímsson: Bannað en samt leyft
• Ólafur Ingi Hrólfsson: Forgangsmál?
• Árni Halldórsson: Ósanngjörn lög