Verð að sjá hvernig mál æxlast

„Ég veit ekkert um þetta, verð bara að sjá hvernig málin æxlast," sagði Kristján L. Möller, samgönguráðherra, þegar hann kom af fundi með  Jóhönnu Sigurðardóttur, forsætisráðherra, í forsætisráðuneytinu nú undir kvöld. Rætt er um breytingar á ríkisstjórninni. 

Kristján sagði við blaðamenn, þegar þeir spurðu hann frétta, að hann legði aldrei neitt mat á sína pólitísku stöðu.

Fyrir liggur, að utanþingsráðherrarnir Ragna Árnadóttir, dómsmálaráðherra og Gylfi Magnússon, efnahags- og viðskiptaráðherra láta af störfum. Þá er rætt um að Ögmundur Jónasson, þingmaður Vinstri grænna, komi á ný inn í ríkisstjórn, nú sem dómsmálaráðherra eða innanríkisráðherra. Í fréttum Stöðvar 2 og Sjónvarpsins voru vangaveltur um að Oddný G. Harðardóttir, þingmaður Samfylkingarinnar, yrði efnahags- og viðskiptaráðherra.

Jóhanna Sigurðardóttur, forsætisráðherra, hefur nú síðdegis rætt við þingmenn og ráðherra Samfylkingarinnar. 

• 1 blogg um fréttina

Bloggað um fréttina

• Einar Guðjónsson: Frankó forsætisráðherra ?