Börnum bjargað úr Krossá

Um 50 krökkum úr Lindaskóla var bjargað úr farþegarútu sem festist í Krossá nú síðdegis. Brugðið var á það ráð að brjóta afturrúðu rútunnar og ferja börnin með handafli yfir á þurrt land. Hluti barnanna var nokkuð skelkaður eftir atvikið og var öllum hópnum því ekið heim og ferðinni aflýst.

Að sögn Ragnheiðar Hauksdóttur, staðarhaldara í Þórsmörk, má rekja óhappið til þess að rútan, sem er gerð út af Teiti Jónassyni, festist í eðju.

Þar sé á ferð aska eftir eldsumbrotin í vor sem valdi því að áin sé erfiðari yfirferðar en í venjulegu árferði.

Ragnheiður bendir hins vegar á að rútan sé aðeins með einu drifi og að stórir jeppar og rútur með drif á öllum hjólum geti því eftir sem áður komist yfir Krossá. Umrædd rúta hafi ekki átt erindi í Krossá.

Ragnheiður segir börnin hafa verið ferjuð yfir ána þar sem skjóls naut með aðferð sem sé í senn alvanaleg og hættulaus.

Því hafi engin hætta verið á ferðum. 

• 1 blogg um fréttina

Bloggað um fréttina

• Börkur Hrólfsson: Börnin í hættu vegna nísku ??