Jenis ætti að skammast sím

Høgni Hoydal, formaður Þjóðveldisins í Færeyjum, segir að Jenis av Rana ætti að skammast sín fyrir að lýsa því yfir að hann ætli ekki að mæta í kvöldverðarboð í kvöld til heiðurs Jóhönnu Sigurðardóttir vegna þess að íslenski forsætisráðherrann væri samkynhneigður.

Jóhanna kom í heimsókn til Færeyja í gærkvöldi ásamt Jónínu Leósdóttur, eiginkonu sinni. Haft var eftir Jenis í gær, að heimsókn Jóhönnu væri hrein ögrun við heilaga ritningu.

Haft er eftir Høgna Hoydal á vefnum portal.fo í dag, að óskiljanleg afstaða Jenis endurspegli á engan hátt afstöðu stjórnmálamanna eða færeysku þjóðarinnar.  Sjálfur líti hann á það sem mikinn heiður, að Jóhanna skuli koma í opinbera heimsókn til Færeyja ásamt Jónínu. 

„Íslendingar eru eina sjálfstæða ríki heims, sem án fordóma býður færeyskum fulltrúum í heimsóknir til Íslands og tekur á móti okkur eins og jafningjum. Með sama hætti sýna íslenskir forsætisráðherrar, forsetar, ráðherrar og aðrir íslenskir leiðtogar okkur þann heiður að heimsækja okkur á jafnréttisgrundvelli eins og við séum sjálfstæð þjóð. Þess vegna er það enn mótsagnarkenndara, að færeyskur stjórnmálamaður skuli opinbera fordóma sína með þessum hætti," segir Høgni.

• 3 blogg um fréttina

Bloggað um fréttina

• Heimir Lárusson Fjeldsted: Fyrir hönd þjóðarinnar bið ég Jenis av Rana afsökunar á …
• Svanur Gísli Þorkelsson: Jenis af Rana og siðgæðið
• Guðlaugur Hermannsson: Jenis av Rana er ekki samkynhneigður að talið sé.