Innlent | mbl | 8.9.2010 | 12:47

Makríll vestar en áður

Makríll.

Helstu niðurstöður sameiginlegs leiðangurs Íslendinga, Færeyinga og Norðmanna eru meðal annars að makríll er með mun meiri dreifingu nú og teygir sig lengra til vesturs en áður hefur sést .

Á tímabilinu 9. júlí til 20. ágúst í sumar tók rannsóknaskipið Árni Friðriksson þátt í leiðangri ásamt einu skipi frá Færeyjum og tveimur frá Noregi. Markmiðið var að rannsaka vistfræði, umhverfi og kortleggja útbreiðslu og magnmæla makríl, síld og kolmunna í kringum Ísland, Færeyjar og í Noregshafi austur af Íslandi allt að ströndum Noregs.

Er þetta í annað sinn sem Íslendingar og Færeyingar taka þátt í þessum leiðangri en Norðmenn hafa stundað viðlíka rannsóknir frá árinu 2004 þótt könnunarsvæðið áður fyrr hafi verið takmarkað við Norskahafið djúpt austur af Íslandi.

Sameiginleg skýrsla um niðurstöður leiðangursins (skýrsla) var nú í lok ágúst lögð fyrir vinnuhóp innan Alþjóðahafrannsóknaráðsins sem vinnur að mati á stærð þessara fiskistofna.

Magn makríls metið með upplýsingum um afla, stærð trolls, togtíma og stærð svæðis (svokölluð “swept area” aðferð) gefur vísbendingu um að 4-5 milljónir tonna makríls voru á rannsóknasvæðinu, þar af um 650 þús. tonn á svæðinu sem Árni Friðriksson fór um innan íslensku landhelginnar, samkvæmt frétt á vef Hafró.

Norsk-íslenska síld var að finna í minna magni nú en árið á undan og var dreifing hennar einnig nokkuð frábrugðin fyrri árum. Þannig var lítið af síld um miðbik svæðisins og eins fyrir suðaustan land, en mesta magnið á norðvestanverðu, norðanverðu og norðaustanverðu könnunarsvæðinu.

Magn átu, sem er helsta fæða þessara fiskistofna, var lítið á öllu svæðinu og hefur magnið ekki mælst minna á þessum slóðum og þessum árstíma síðan þessar mælingar hófust 2004.

Í leiðangrinum var einnig safnað magasýnum úr þessum uppsjávartegundum til að kanna fæðu þeirra, en úrvinnsla sýna er enn skammt á veg komin, að því er segir á vef Hafró.