Mikill verðmunur á ýsu

Mikill verðmunur er á ýsu í fiskbúðum og stórmörkuðum á höfuðborgarsvæðinu og Akureyri samkvæmt verðsamanburði verðlagseftirlits ASÍ. Lægsta verð á roðflettri og beinlausri ýsu var í Fiskbúðinni Hafrúnu í Skipholti og Litlu fiskbúðinni Miðvangi í Hafnarfirði eða 1.290 kr/kg.  Hæsta verðið var hins vegar hjá Fiskikónginum á Sogavegi 1.790 kr/kg.  Munurinn er 38,8%. Verðsamanburðurinn var gerður á mánudag.

Skoðaðar voru 29 tegundir af fiskmeti. Lægsta verðið var oftast að finna í Litlu fiskbúðinni Miðvangi í 13 tilvikum af 29. Fjarðarkaup var með lægsta verðið í 7 tilvikum af 29 en verslanirnar eru báðar staðsettar í Hafnarfirði. Hæsta verðið var oftast í Kjöt og fisk Bryggjuhúsinu Höfðabakka eða í 7 tilvikum af 29. Almennt var mikill verðmunur á milli verslana.  Í flestum tilvikum var munur á hæsta og lægsta verði um eða yfir 50%.

75,5% dýrara að kaupa fiskibollur á Suðurlandsbraut en í Nethyl

Fiskibollur voru ódýrastar í Gallerý fiskur í Nethyl eða 849 kr/kg en dýrastar í Fylgifiskum á Suðurlandsbraut 1.490 kr/kg.  Verðmunurinn er 75,5%.

Verðmunur á steinbíti 155%

Munur á lægsta og hæsta verði var frá 35% upp í 155%.  Mestur verðmunur í könnuninni var á roðflettum steinbítsflökum sem voru dýrust á 2.498 kr./kg í Nóatúni en ódýrust á 980 kr./kg í Fjarðarkaup en það gera 1.518 kr./kg verðmun eða 155%.

Minnstur verðmunur var á eldislaxi í sneiðum, sem var ódýrastur á 1.258 kr./kg í Fjarðarkaup og dýrastur á 1.698 kr./kg í Melabúðinni.  Munurinn er 35% eða 440 kr./kg.

 Mesta úrvalið í verslun Hafberg í Gnoðarvogi

Mikill munur var á vöruúrvali í þeim verslunum sem farið var í. Flestar vörurnar í könnunni voru fáanlegar í Hafberg í Gnoðarvogi en þar fengust allar 29 tegundirnar. Fiskbúðin Trönuhrauni  átti 28 tegundir og Heimur Hafsins á Akureyri var með 27 tegundir

 Könnunin var gerð í eftirtöldum verslunum:  Fylgifiskar Suðurlandsbraut, Fiskbúðinni Sundlaugavegi, Hafberg Gnoðavogi, Fiskikóngurinn Sogavegi, Fiskbúðinni Háaleitisbraut, Fiskbúðin Hafrún Skipholti, Melabúðinni Hagamel, Fiskbúðinni Freyjugötu, Fjarðarkaup Hafnarfirði, Fiskbúðinni Trönuhrauni, Litlu fiskbúðinni Hafnarfirði, Nóatúni í Nóatúni, Fiskbúð Hólmgeirs Þönglabakka, Gallerý fiski Nethyl, Kjöt og fiskur Bryggjuhúsinu Höfðabakka, Fiskbúðin Hófgerði, Fiskbúðin Mosfellsbæ, Til sjávar og sveita Ögurhvarfi, Samkaup Úrval Akureyri, Heimur hafsins Akureyri og Hagkaup Akureyri.

• 1 blogg um fréttina

Bloggað um fréttina

• Haraldur Haraldsson: Mikill verðmunur á ýsu/svo er þetta þvi miður þarna vantar …