„Ólafur Ragnar farinn að skilja heiminn"

Róbert Trausti Árnason,fyrrum ráðuneytisstjóri í utanríkisráðuneytinu, forsetaritari og núverandi starfsmaður Samtaka atvinnulífssins í Brussel, segir í pistli sem hann ritar í dag á Pressuna að það blasi við að Ólafur Ragnar Grímsson, forseti Íslands, sé farinn að skilja heiminn.

„Allar götur frá embættistöku forseta Íslands, Ólafs Ragnars Grímssonar, sumarið 1996 hef ég veitt því sérstaka eftirtekt, hvað forsetinn lætur feikimargt ógert.

Miklu frekar en að ég veiti því sérstaka eftirtekt, hvað það er sem hann gerir. Einkum á seinni árum.

Ólafur Ragnar hefur til dæmis ekki enn komið  í opinbera heimsókn til alþjóðastofnana hér í  Brussel til að kynna sér heimsmálin. Kínverjar eru hins vegar hér, sem mý á mykjuskán. Þeir skilja heiminn. Enda vel að sér um öll heimsmál.

Vera má að þarna fylgi Ólafur Ragnar óvart því viðhorfi fyrsta forseta Íslands.  Sá forseti, Sveinn Björnsson, sagði að hann vildi frekar, að menn spyrðu að því hvers vegna forsetinn væri ekki viðstaddur þetta eða hitt, heldur en að menn spyrðu; “Hvað er nú forsetinn að vilja hér?“

Eða þá að Ólafur Ragnar  fylgir þeirri sannfæringu fjórða forseta Íslands, frú Vigdísar. Þeirri sannfæringu, að forsetinn mætti ekki undir nokkrum kringumstæðum heimsækja alþjóðastofnanir í Brussel.  „ Af því, ráðuneytisstjóri góður, að þjóðin mín myndi ekki skilja það.“ Þegar öllu er á botninn hvolft þá er það vissulega sjónarmið.

En Ólafur Ragnar virðist hafa fengið brennandi áhuga á nýjustu heimsmálunum austur í Kína – Norðurskautsmálunum.  Enda Kínverjar vel að sér um öll heimsmál. Þeir skilja heiminn. Allavega fannst mér ég heyra það á honum í ágætum sunnudagsþætti á Útvarp Saga s.l. sunnudag.

Ólafur Ragnar talaði þarna eins og þegar hann er upp á sitt besta. Og þá er hann harla góður.

Mér er sagt að viðurkenning á staðreyndum sé upphaf allrar visku. Lítið á landakortið. Ísland er þar sem það er. Það breytir enginn landafræðinni.

Ný-raunsæisstefna Evrópusambandsins í málefnum Íslands og Norðurskautsins er tilefni þess að enn einn evrópskur þjóðhöfðingi, forseti Íslands,  hefur nú kynnt raunsætt mat sitt á staðreyndum um þróun heimsmála í okkar heimshluta.

Ég er mjög hissa á þessu, því ég hélt að forsetinn hefði ekki nokkurn áhuga á þessum málum. Að Norðurheimsskautið hefði einfaldlega ekki nóg seiðmagn fyrir forsetann. Gott að mér skjátlast. Hér er sennilega orðin breyting á viðhorfum forsetans, og ef svo er, þá ber að fagna því.

Enda er forseti Ísland, Ólafur Ragnar Grímsson,  þar með orðinn öflugur liðsmaður í þeirri viðleitni atvinnulífsins á Íslandi að nýta öll tækifærin, sem siglingar um þetta „nýja Miðjarðarhaf“ bjóða upp á. Ásamt þeirri sókn og atvinnusköpun sem byggir á  ónýttum auðlindum á norðurslóðum.

Það blasir við að forseti Íslands, Ólafur Ragnar Grímsson, er byrjaður að skilja heiminn," segir í pistli Róberts Trausta.

• 2 blogg um fréttina

Bloggað um fréttina

• Ómar Geirsson: ESB dindill rífur kjaft.
• Axel Þór Kolbeinsson: Ég vil leiðrétta Róbert