Bíða niðurstöðu þingmannanefndar

Boðað verður aftur til þingfundar á Alþingi þegar niðurstaða þingmannanefndarinnar liggur fyrir. Nefndin fer nú yfir þingsályktunartillögurnar um málshöfðun gegn fyrrverandi ráðherrum á milli fyrri og síðari umræðu þingsins.

Ásta Ragnheiður Jóhannesdóttir, forseti Alþingis, segir ekki hægt að segja til um það á þessari stundu hvenær nefndin mun skila málinu frá  sér.

Auk þingsályktunartillagnanna fer nefndin yfir breytingartillögur  sem komið hafa fram við skýrslu nefndarinnar. Stuttur tími er til stefnu ef ljúka á afgreiðslu málsins á þessu haustþingi, því nýtt þing kemur saman 1. október.

Ásta Ragnheiður segir að um leið og nefndin hefur lokið störfum þá  hefjist þingfundir að nýju.

Fram kemur í tilkynningu frá Sjálfstæðisflokknum, að Bjarni Benediktsson, formaður flokksins, hafi farið fram á að þingstörf haldi áfram á meðan þingmannanefnd Alþingis fjallar um þingsályktunartillögur nefndarinnar. Þessu hafi meirihluti ríkisstjórnarflokkanna í forsætisnefnd þingsins hafnað.

Meðal þess sem Bjarni fór fram á að rætt yrði eru niðurstöður Hæstaréttar í gengistryggingarmálum, niðurstöður nefndar um Magma-málið og dómur héraðsdóms um ákvörðun umhverfisráðherra vegna virkjanamála í Neðri-Þjórsá.

• 1 blogg um fréttina

Bloggað um fréttina

• Björn Birgisson: Björgvin G. Sigurðsson axlaði einn ábyrgð