Skila umsögn á morgun

Allsherjanefnd mun skila umsögn sinni um tillögur þingmannanefndarinnar á morgun að sögn Róberts Marshalls, þingmanns Samfylkingarinnar og  formanns nefndarinnar. „Við höfum frest til 16:30 á morgun en við stefnum á að ná því,“ segir Róbert.

Bæði allsherjarnefnd Alþingis og þingmannanefndin undir forystu Atla Gíslasonar, þingmanns Vinstri grænna, funduðu í dag um þær tillögur um málshöfðun gegn ráðherrum sem liggja fyrir Alþingi.

Allsherjarnefnd hefur verið beðin um að skila umsögn sinni um tillögurnar til þingmannanefndarinnar síðdegis á morgun. Þingmannanefndin, sem er með málið, stefnir að því að skila nefndaráliti á laugardag. Gangi þetta eftir er líklegt að seinni umræða um tillögur til málshöfðunar gegn ráðherrum hefjist á mánudag.

Talið er öruggt að komi þingsályktunartillaga meirihluta þingmannanefndarinnar, um að fjórir fyrrverandi ráðherrar verði ákærðir og dregnir fyrir landsdóm, til atkvæðagreiðslu á Alþingi verði hún borin undir atkvæði í fjórum liðum: Fyrst verði greidd atkvæði um Geir H. Haarde, fyrrverandi forsætisráðherra, því næst um Ingibjörgu Sólrúnu, fyrrverandi utanríkisráðherra, þá Árna M. Mathiesen, fyrrverandi fjármálaráðherra, og loks Björgvin G. Sigurðsson, fyrrverandi viðskipta- og bankaráðherra.

Róbert Marshall formaður allsherjarnefndar.

• 4 blogg um fréttina

Bloggað um fréttina

• Björgvin Guðmundsson: Allsherjarnefnd skilar umsögn á morgun
• Sigurður Sigurðsson: Er ekki í lagi með Alþingismenn
• Björn Birgisson: Tveir á höggstokkinn eða enginn
• Sigurður Haraldsson: Nefdin skilar á morgun!